છોટા ઉદેપુર જિલ્લાનું અંબાલા એક એવું ગામ કે જ્યાં હજી સુધી કોઈ વરરાજા ઘોડે ચઢી જાન લઇને પરણવા ગયો નથી કે કોઈ વરરાજા બની ગામમાં પરણવા આવ્યો નથી. એટલે કે આ ગામમાં લોકો લગ્ન કરતાં જ નથી એવું પણ નથી પરંતુ વરરાજાની બહેન જાન લઈને જાય છે અને જાન લઈને આવે છે, જેને પાટી લગ્ન તરીકે ઓળખાય છે.
છોટાઉદેપુર જિલ્લાના 888 ગામોમાં અંબાલા એક એવું ગામ છે કે જે ગામ કલા સંસ્કૃતિ રીત રિવાજોનું સંરક્ષણ અને સંવર્ધન કરવામાં હંમેશાં અગ્રેસર રહ્યું છે. સદીઓ જૂની પરંપરા મુજબ છોટાઉદેપુર જિલ્લાના સનાડા, સુરખેડા અને અંબાલા ગામમાં લગ્ન પ્રસંગ દરમિયાન પાટી લગ્ન લેવાની પરંપરા હતી. પરંતુ સનાડા તેમજ સુરખેડામાં આ પરંપરા લુપ્ત થઈ રહી છે. ત્યારે અંબાલાના લોકો આ પરંપરાને આજે પણ નિભાવી રહ્યાં છે.
કહેવાય છે કે, આ ગામના દેવ અન્યને પરણાવવામાં ખુદ કુંવારા રહી ગયા હોવાની માન્યતાને લઇને અંબાલામાં કોઈ વરારજા આજ દિન સુધી ઘોડે ચઢી પરણવા જતો નથી, કે આવી શકતો નથી. પરંતુ તેની જગ્યાએ તેની કુંવારી નાની બહેન વરરાજા તરીકે પરણવા જાય કે આવતી હોય છે. એવી માન્યતા રહી છે કે આ ગામમાં કોઇ વરરાજા જાન લઇ પરણવા જાય કે આવે તે યુગલને સંતાન પ્રાપ્તિ થતી નથી, કે તેમનું લગ્ન જીવન ટકતું નથી. જેને લઇને આજ દિન સુધી આ ગામમાં આ પ્રથા ચાલે છે.આ જ અમારી અસલી ઓળખ છે આ પરંપરા અમારા વડવાઓએ આપેલી ભેટ છે જેથી અમે ગામ લોકો આ પરંપરા છોડવા માંગતા નથી. અને ભવિષ્યમાં પણ આ પરંપરાનું સંરક્ષણ અને સંવર્ધન થાય તે માટે ગામ લોકોએ આ પરંપરા નિભાવી છે અને નિભાવવાના છે અને આ જ અમારી અસલી ઓળખ છે. > સુરસિંગ રાઠવા, યુવા કાર્યકર્તા
Reporter: News Plus
